Үш мыңнан астам көрерменге киберқылмыс пен нашақорлықтың қаупі түсіндірілді
Қ.Мұңайтпасов атындағы «Жекпе-жек» сарайында өткен сегіз мемлекеттің спортшылары қатысқан STEPPE BOXING 1 халықаралық кәсіпқой бокс турнирі аясында облыстық Полиция департаментінің Есірткі қылмысына қарсы іс-қимыл басқармасы мен Киберполиция қызметкерлері халық арасында ауқымды профилактикалық жұмыс жүргізді, деп хабарлайды Ilove-ulan.kz тілшісі.
Негізгі назар киберқылмыстың, оның ішінде дропперліктің алдын алуға, сондай-ақ жастар арасындағы нашақорлыққа жол бермеуге аударылды.
Көрермендерге интернет-алаяқтықтың кең таралған әдіс-тәсілдері түсіндіріліп, банк карталары мен жеке мәліметтерді үшінші тұлғаларға беруге болмайтыны ескертілді.
Сондай-ақ, заңсыз әрекеттерге қатысудың құқықтық салдары туралы ақпарат берілді. Бұдан бөлек, есірткі заттарының зияны мен олардың заңсыз айналымы үшін көзделген жауапкершілік туралы алдын алу әңгімелері жүргізілді.
Қазақстан кәсіпқой бокс федерациясының президенті Рахымжан Ерденбеков киберқылмыстың алдын алуда дропперлік тақырыбының өзектілігіне тоқталды.
Белгілі блогер Қайрат Олжас та бұл бастаманы қолдады.
Өңірдегі полиция қызметкерлерінің айтуынша, мұндай форматтағы жұмыс спортты, салауатты өмір салтын және азаматтарды қауіпсіздік шаралары мен жауапкершілік туралы уақытында ақпараттандыруды ұштастыра отырып, үлкен аудиторияны қамтуға мүмкіндік береді.