Аймақтың 2025 жылғы әлеуметтік-экономикалық дамуында оң өзгерістер тіркелді
Өңірлік коммуникациялар қызметінің алаңында Қазақстан Республикасы Стратегиялық жоспарлау және реформалар агенттігі Ұлттық статистика бюросы Шығыс Қазақстан облысы бойынша департаментінің басшысы Ерназ Нұрланұлы 2025 жылғы әлеуметтік-экономикалық даму қорытындылары туралы мәлімдеді, деп хабарлайды Ilove-ulan.kz тілшісі.
2025 жылдың қорытындысы бойынша облыстың әлеуметтік-экономикалық дамуында бірқатар оң өзгерістер тіркелді. Ауыл шаруашылығы, бөлшек сауда, құрылыс жұмыстары және негізгі капиталға инвестициялар көлемінің өсуі байқалды. 2025 жылғы қаңтар–желтоқсан аралығында өнеркәсіп өндірісінің көлемі 3 трлн. 346 млрд. 770,6 млн. теңгені құрады.
Өнеркәсіп өндірісінің индексі 95,0% деңгейінде қалыптасты. Ауыл шаруашылығы өнімінің көлемі 556,4 млрд теңгеге жетіп, нақты көлем индексі 102,0% болды. Мал шаруашылығы 4,4%-ға өссе, өсімдік шаруашылығында аздаған төмендеу тіркелді. Облыс ет өндіру бойынша республикада төртінші, сүт өндіруден бесінші орында.
Жолаушы айналымы 7,1%-ға артқанымен, жүк айналымының төмендеуі байқалды. Жыл қорытындысы бойынша инфляция деңгейі 112,4% болды. 2026 жылғы 1 қаңтардағы жағдай бойынша облыс халқы 718,9 мың адамды құрады. Өткен жылмен салыстырғанда халық саны 5022 адамға азайды.
Жұмыссыздық деңгейі 4,6% шамасында қалыптасты. Жалпы алғанда, жекелеген салаларда өсім тіркелгенімен, кейбір бағыттарда төмендеу байқалады.
Дегенмен өңір экономикасы тұрақты даму үрдісін сақтап отыр.
Фото: ӨКҚ