Қазақстанда туберкулезбен сырқаттанушылық 13 пайызға төмендеді
Қазақстан туберкулезді жоюға бағытталған жаһандық бастамаларға адалдығын сақтап келеді. Дүниежүзілік туберкулезге қарсы күрес күні қарсаңында Денсаулық сақтау министрі Ақмарал Әлназарова Дүниежүзілік денсаулық сақтау ұйымы ұйымдастырған жоғары деңгейдегі диалогқа қатысып, бұл бағыттағы маңызды мәселелерді талқылады, деп хабарлайды Ilove-ulan.kz тілшісі.
Кездесу барысында елдердің End TB жаһандық стратегиясының мақсаттарына жету жолындағы күш-жігері және туберкулезбен күрестегі халықаралық ынтымақтастықты нығайту тетіктері сөз болды.
Министр өз сөзінің бастамасында адам денсаулығын қорғауда әлем елдерінің күш біріктіруінің маңыздылығына ерекше тоқталды.
Бүгінде елімізде заманауи молекулалық-генетикалық диагностика әдістері енгізілген. Бұл тәсілдер бірнеше сағат ішінде аурудың бар-жоғын және қоздырғыштың дәрілік препараттарға сезімталдығын анықтауға мүмкіндік береді. Сонымен қатар мұндай зертханалық қызметтер өңірлік фтизиопульмонология орталықтарының барлығында қолжетімді.
Министрдің айтуынша, инновациялық емдеу тәсілдерінің енгізілуі, соның ішінде қысқартылған және толықтай таблетка түріндегі терапия режимдері емдеу мерзімін едәуір қысқартып, оның тиімділігін арттыруға әрі пациенттердің өмір сапасын жақсартуға жол ашты.
Аурудың алдын алу мәселесі де назардан тыс қалған жоқ. Қазақстанда БЦЖ вакцинациясымен қамту деңгейі жоғары, сондай-ақ туберкулез инфекциясының алдын алу емін кеңейту және заманауи скрининг әдістерін енгізу жұмыстары жалғасып келеді.
Жүргізілген кешенді шаралардың нәтижесінде елімізде эпидемиологиялық көрсеткіштердің тұрақты төмендеуі байқалады.
Министр қол жеткізілген нәтижелер жүйелі мемлекеттік саясаттың, тұрақты қаржыландырудың және халықаралық ұйымдармен тығыз әріптестіктің арқасында мүмкін болғанын жеткізді.
Фото: gov.kz