Ақтүтекке қарсы 800 техника: қысқы маусымда аймақ жолдары қалай тазалануда?
Биыл өңір жолдары қыс мезгіліндегі күрделі жағдайларға қаншалықты дайын болды? Өңірлік коммуникациялар қызметінде өткен брифинг барысында ШҚО Жолаушылар көлігі және автомобиль жолдары басқармасы басшысының міндетін атқарушы Ернар Маулетхановтың айтуынша, облыста республикалық, облыстық және аудандық маңызы бар жолдар мен елді мекен көшелерін күтіп-ұстау үшін 806 бірлік арнайы техника жұмылдырылды, деп хабарлайды Ilove-ulan.kz тілшісі.
Республикалық тас жолдарда «КАЖсервис» ШҚ ОФ ЖШС қармен арпалысуда. Олардың 103 техникасының 96 пайызы кез келген уақытта жолға шығуға дайын. Ал облыстық бағыттарда «ОблШығысЖол» ЖШС-нің 119 техникасы тынымсыз қызмет атқаруда. Аудандық жолдар мен ауыл көшелерінде 584 техника тұрғындардың қауіпсіз қозғалысын қамтамасыз етуде.
Боран күшейіп, жағдай күрделене қалса, іске қосылатын 185 бірлік қосымша техника, сондай-ақ ауыр бульдозерлер мен автогрейдерлерден құралған жедел жасақ бар. Жол үстінде қалған жүргізушілер де назардан тыс қалмайды. Климаттық жағдайы қиын аумақтарда жол пайдалану пункттері мен жылыту орындары жұмыс істеп тұр. Мұнда жолаушылар жылынып, демалып, қажетті көмек ала алады.
Өңірде қысқа дайындық алдын ала басталды. Жолдарға көктайғаққа қарсы материалдар себіліп, 100 тонна техникалық тұз, мыңдаған сигналдық бағаналар мен жол белгілері әзірленді. Қар жиі басатын және көшкін қаупі бар учаскелерде арнайы қалқандар орнатылып, алдын алу жұмыстары жүргізілді.
Айта кетсек, былтырғы 1 қарашадан бастап облыс жолдары тәуліктік бақылауда. Жол қызметтері, полиция және төтенше жағдайлар органдары бірлесе жұмыс істеп, жолдағы ахуалды аймақтық БАҚ және мессенджерлер арқылы халыққа жедел жеткізіп келеді.
Фото: Өңірлік коммуникациялар қызметі