Шығыс Қазақстанда ертең қалың тұман күтіледі

"Қазгидромет" РМК ШҚО филиалының ақпараты бойынша 26 наурызда түнде және таңертең облыстың солтүстігінде, шығысында, оңтүстігінде тұман, жолдарда көктайғақ күтіледі, деп хабарлайды Ilove-ulan.kz тілшісі.

Өскемен қаласын түнде және таңертең тұман басады.

– Жүргізушілерді дауылды ескертуді ескеруге, жолда жылдамдық режимі мен қашықтықты сақтауға шақырамыз. Жаяу жүргіншілер жарақат алу мүмкіндігін азайту үшін тиісті шаралар қабылдауы керек, – делінген филиал хабарламасында.

Төтенше жағдайлар туындаған кезде «112» телефоны бойынша хабарласу қажет.

Фото: Altainews.kz

Щучинсктегі қайғылы жағдайдан кейін Шығыстағы кәсіпкерлерге қауіпсіздік талаптары ескертілді

Шығыс Қазақстан облысының Кәсіпкерлер палатасында қоғамдық тамақтану нысандарының өкілдерімен кездесу өтті. Кездесу барысында өрт және өнеркәсіптік қауіпсіздік талаптарын сақтау мәселелері қаралды, деп хабарлайды Ilove-ulan.kz тілшісі.

Аталған тақырыпқа ерекше назар аударуға Щучинск қаласында 26 ақпанда орын алған қайғылы жағдай себеп болды. Онда кафелердің бірінде газ-ауа қоспасының жарылуы салдарынан адамдар қаза тапты. Бұл оқиға адамдар көп жиналатын нысандарда қауіпсіздік талаптарын қатаң сақтаудың маңыздылығын тағы да көрсетті.

Өскемен қаласы Төтенше жағдайлар басқармасының өкілдері кәсіпкерлерге газ жабдықтары мен электр желілерін пайдалану кезіндегі міндетті талаптарды еске салды. Әсіресе, газ баллондарын сақтау және пайдалану қағидаларын бұза отырып қолдануға жол берілмейтініне ерекше назар аударылды.

Сондай-ақ, Өскемен қаласы ТЖБ өкілдері қазіргі уақытта бақылау тек профилактикалық қадағалау шеңберінде, сондай-ақ өтініштер келіп түскен және нақты құқықбұзушылық фактілері анықталған жағдайда жоспардан тыс жүргізілетінін атап өтті.

– Щучинск қаласындағы қайғылы жағдайдан кейін профилактикалық жұмыстарды күшейту, оның ішінде қосымша рейдтік іс-шаралар өткізу және кәсіпкерлер арасында түсіндіру жұмыстарын жүргізу туралы шешім қабылданды, – деп атап өтті ведомство өкілдері.

Сондай-ақ, кездесу қатысушыларына өрт қауіпсіздігі бойынша тұрақты түрде нұсқамадан өту, персоналды оқыту және эвакуация бойынша практикалық жаттығулар өткізу қажеттігі еске салынды.

– Бүгінде әрбір кәсіпкер келушілер мен қызметкерлердің қауіпсіздігі үшін жауапкершілік деңгейін толық сезінуі аса маңызды. Щучинск қаласындағы қайғылы жағдай қарапайым талаптарды сақтамау қандай салдарға әкелетінін көрсетті. Қауіпсіздік әрбір қоғамдық тамақтану нысаны қызметінің басты басымдығына айналуы тиіс, – деп атап өтті ШҚО Кәсіпкерлер палатасы директорының құқықтық мәселелер жөніндегі орынбасары Айжан Жәңгірханова.

Қосымша айта кетейік, Өскемен қаласы ТЖБ мәліметіне сәйкес, тұрғын үй-коммуналдық шаруашылық саласында газ жабдықтарын пайдалануды бақылау және тексеру функциялары жүктелген арнайы газ инспекциясы құрылған.

Тасқынға тосқын: облыс аумағының 89 пайызын қар басып жатыр

Өңірдегі «Қазгидромет» РМК филиалы мамандары айтып өткендей, облыс бойынша гидрометеорологиялық мониторингті 23 метеорологиялық станция, 53 гидрологиялық бекет (оның 51 тұрақты, 2 маусымдық), 5 агрометеорологиялық бекет және 8 қар өлшегіш маршрут жүзеге асырады, деп хабарлайды Ilove-ulan.kz тілшісі.

Қазіргі уақыттағы гидрометеорологиялық жағдайға келсек, жерді қашықтықтан зондтау деректеріне сәйкес аймақ аумағының 89%-ы қар жабындысын жамылған.

– Метеостанция мәліметтері бойынша қар жамылғысында су қоры орташа көпжылдық мәндерден асуы Зайсан ауданында (фактісі 112 мм, нормасы 62 мм, былтырғы мәні 47 мм), Шемонаиха ауданында (факті 143 мм, нормасы 109 мм, былтырғы мәні 143 мм), Үлкен Нарын ауданында (факті 108 мм, нормасы 74 мм) және Тарбағатай ауданында (факті 72 мм, нормасы 43 мм, былтырғы мәні 34 мм) байқалуда. Алтай және Марқакөл аудандарында нормаға жақын және былтырғы мәннен төмен. Ал қалған Катонқарағай, Глубокое, Самар, Күршім және Риддер аудандарында қар қорының көрсеткіштері көпжылдық нормадан төмен, сондай-ақ өткен жылдың көрсеткіштерінен төмен, – деп атап өтті Шығыс Қазақстан және Абай облыстары бойынша «Қазгидромет» филиалы гидрология бөлімінің басшысы Іңкәр Асқарова.

Бөлімі басшысы келтірген мәліметтерге сүйенер болсақ, таулы аумақтарда, оның ішінде Зайсан ауданының Кендірлік қар өлшеу бағдарында қар қоры былтырғы көрсеткіштен 40%-ға жоғары.

Сондай-ақ, топырақ бетінде мұз қабығы Тарбағатай ауданының Тұғыл ауылында (3,7 мм) байқалады. Айта кету керек, мұз қабығының қалыптасуы судың топыраққа сіңуін қиындатып, еріген қар суы ағынын және беткейлік ағындарды қалыптастыруы мүмкін.

Топырақтың күзгі ылғалдылығы облыс аумағының көп бөлігінде нормадан жоғары, тек Күршім және Шемонаиха аудандарында бұл көрсеткіштер нормадан төмен.

– Топырақтың қату тереңдігі облыста 23 сантиметрден 101 сантиметрге дейін қалыптасты. Ең үлкен қату тереңдігі Үлкен Нарын ауданында байқалды 101 см (былтырғы мәні 116 см). Самар ауданында – 36 см (9 см) және Риддер қаласында – 50 см (28 см) былтырғы мәндерден жоғары. Тарбағатай ауданы былтырғыға жуық. Қалған аудандарда топырақтың қату тереңдігі өткен жылмен салыстырғанда аз. Топырақ тоңының 1-2 см-ге азаюы Шемонаиха, Үлкен Нарын, Ұлан және Самар аудандарында байқалады, – деп қосты Іңкәр Асқарқызы.

Жалпы алғанда брифингке қатысқан спикерлер гидрологиялық жағдай тұрақты екенін айтады. Барлық гидробекеттерде су деңгейі қауіпті деңгейден төмен. Облыстың көптеген өзендерінде мұз құбылыстарының әлсіреуі және сулылықтың артуы байқалады.

Бұқтырма және Шүлбі су қоймаларына наурыз айына болжанған су көлемі тиісті норма шамасында.

– 17-21 наурыз аралығында консультативтік ауа райы болжамына сәйкес облыс бойынша жауын-шашынсыз ауа райы күтіледі. Түнгі ауа температурасы 7-15°-тан 3-8°-қа дейін, Марқакөл ауданында 18°-тан 13°-қа дейін төмен, күндіз 0-6° жылы болады. Осы Марқакөл ауданында 3-5° аяз болады деп күтілуде. Үшінші онкүндіктің басында жаңбыр мен дымқыл қар түрінде жауын-шашын болады, түнгі температураның кей жерлерде 2-3° жылыға дейін көтерілуі, ал күндіз облыс бойынша 0-8° жылылық күтіледі. Үшінші онкүндіктің ортасынан бастап, түнде температураның 5-13°, күндіз 3°-қа дейін төмендеуі болжанады, – деді бөлім басшысы Іңкәр Асқарова.

Көпжылдық гидрологиялық деректерді талдауға, сондай-ақ түскен жауын-шашын мөлшерін, қар жамылғысындағы су қорын, күзгі топырақ ылғалдылығын, топырақтың қату тереңдігін, топырақ бетінде мұз қабығының болуы мен ауа райы болжамына сәйкес Шығыс Қазақстан облысы су тасқыны қаупі жоғары аймақтардың бірі болып қала береді.

Өңірдің Алтай, Глубокое, Зайсан, Тарбағатай, Самар, Ұлан және Үлкен Нарын аудандары қауіпті аумақтар қатарында.

Орташа қауіптілік Катонқарағай, Күршім, Марқакөл, Шемонаиха аудандарында, сондай-ақ Риддер қаласының әкімшілік аумағында болады дем болжануда.

Айта кетейік, «Қазгидромет» филиалы күтілетін синоптикалық және гидрологиялық жағдайды талдау негізінде қауіпті ауа райы құбылыстары мен табиғи гидрологиялық құбылыстар туралы дауылды ескертулерді уақтылы шығарып, оларды барлық мүдделі органдарға, атап айтқанда өңірдегі ТЖД мен жергілікті атқарушы органдарға шұғыл жолдап отырады.

ШҚО су қоймаларындағы жағдай: гидронысандар штаттық режимде жұмыс істеп тұр

Өңірдегі ірі су қоймаларындағы ахуал тұрақты. Бүгінгі күнгі мәліметтерге сәйкес, гидротехникалық нысандар қалыпты жұмыс режимін сақтап отыр, деп хабарлайды Ilove-ulan.kz тілшісі.

Ертіс өзені алабында еліміз үшін стратегиялық маңызы зор гидротехникалық нысандар жүйесі – Ертіс су қоймалары каскады орналасқан. Бұл кешен өзен ағынын реттеуде шешуші рөл атқарады.

Ертіс бассейндік су ресурстарын реттеу, қорғау және пайдалану жөніндегі инспекциясы басшысының орынбасары Ернар Мәдиевтің айтуынша, каскад құрамына бірнеше ірі су қоймасы кіреді. Соның бірі – Бұқтырма су қоймасы. Оның жобалық көлемі 49 620 млн текше метрді құрайды және ол Ертіс өзенінің ағынын көпжылдық реттеуді қамтамасыз етеді.

Сондай-ақ, бұл жүйеде Өскемен су қоймасы маңызды орын алады. Жобалық көлемі 655 млн текше метр болатын бұл нысан Бұқтырма су қоймасының қарсы реттеушісі қызметін атқарады.

– Ал Шүлбі су қоймасы маусымдық реттеу міндетін орындайды. Оның жобалық сыйымдылығы 2 390 млн текше метрді құрайды және өзен ағынын жыл мезгілдеріне қарай тиімді басқаруға мүмкіндік береді. Осылайша, Ертіс өзенінің ағыны толықтай осы су қоймалары каскады арқылы реттеліп, су ресурстарын тиімді пайдалану мен өңірдің қауіпсіздігін қамтамасыз етуге бағытталған, – деді Ернар Сламбекұлы.

Бұқтырма су қоймасында су көлемі 36 300 млн текше метрді құрап, бұл жалпы сыйымдылықтың 73,2 пайызына тең. Қоймада 13 320 млн текше метр бос көлем бар. Су келімі секундына 199 текше метр болса, су жіберу көлемі 447 текше метрді құрайды.

– Өскемен су қоймасы қарсы реттеуші ретінде транзиттік режимде жұмыс істеп тұр. Қазіргі таңда мұндағы су көлемі 638 млн текше метрге жетіп, 97,4 пайызды құрайды. Бос көлем – 17 млн текше метр. Су келімі секундына 447 текше метр болса, су жіберу көлемі 417 текше метр деңгейінде. Ал Шүлбі су қоймасында су қоры 2 087 млн текше метрді немесе 75,1 пайызды құрайды. Қоймада 693 млн текше метр бос көлем бар. Су келімі секундына 468 текше метр, ал су жіберу көлемі 651 текше метрге тең, – деді Ертіс бассейндік су ресурстарын реттеу, қорғау және пайдалану жөніндегі инспекциясы басшысының орынбасары Ернар Мәдиев.

Жалпы алғанда, өңірдегі су электр станцияларының каскады штаттық режимде жұмыс істеп, су ресурстарының қозғалысы тұрақты бақылауда ұсталып отыр.

Фото: ШҚО ТЖД баспасөз қызметі

Шығыс Қазақстан құтқарушылары көктемгі су тасқынының бірінші кезеңіне дайындықты ширатты

Көпжылдық бақылауларға сәйкес облыста су тасқынының бірінші кезеңі өзендердің мұз құрсауынан ашылуы кезінде, яғни наурыз айының екінші онкүндігінің соңынан сәуір айының екінші онкүндігі соңына дейін байқалады. Осы кезеңде Қара Ертіс, Үлбі, Бұқтырма, Күршім, Абылайкит, Ақсу өзендерінде мұз кептелістерінің пайда болу қаупі бар, деп хабарлайды Ilove-ulan.kz тілшісі.

Аймақтағы Төтенше жағдайлар департаменті мамандарының айтуынша, 1 ақпаннан бастап жоғары дайындық режимі енгізіліп, департаментте жедел штабтың тәулік бойы кезекшілігі ұйымдастырылған.

Сонымен бірге әрбір су басу қаупі бар елді мекен бойынша жергілікті атқарушы органдардың, қалалар мен аудандардың төтенше жағдайлар бөлімшелерінің жауапты тұлғалары бекітіліп отыр.

– Су тасқыны кезеңіне дайындық жұмыстары алдын ала басталды. Облыстың су тасқынына қарсы іс-шаралар жоспары әзірленді. 2025 жылдың жазғы-күзгі кезеңінде 10 өңірде инженерлік жұмыстар жоспарына сәйкес 28 іс-шара орындалды (Риддер қаласы – 1, Глубокое ауданы – 5, Катонқарағай ауданы – 4, Самар ауданы – 1, Марқакөл ауданы – 3, Алтай ауданы – 3, Үлкен Нарын ауданы – 1, Шемонаиха ауданы – 8, Ұлан ауданы – 3, Күршім ауданы – 1). 2026 жылғы 9-15 ақпан аралығында жергілікті атқарушы органдардың су тасқыны кезеңі дайындығына жұмыс топтары тексеру жүргізді. Тексеру нәтижелері бойынша актілер жасалып, қажетті ұсыныстар берілді, – деді облыстық ТЖ департаменті бастығының ороынбасары Амангелді Еңсегенов.

Спикер брифингте келтіргендей, ақпан айының үшінші онкүндігінен бастап каналдарды, арықтарды, су өткізу құрылыстарын және көпірлерді тазарту бойынша жұмыстар жүргізілуде.

– Бүгінгі таңда су тасқынына қарсы іс-шаралардың 84,4%-ы орындалды, оның ішінде: каналдардың – 81,8 %, арықтардың – 74,3 %, су өткізу құрылыстарының – 86,1%, көпірлердің – 90% тазартылды. Елді мекендерден 335 мың текше метр қар шығарылды. 82 мың дана қап, 10,2 мың тонна инертті материал, 393 тонна жанар-жағар май материалдық қорлары дайындалды. Су тасқынының алдын алу мақсатында 7 аудан әкімдіктерімен (Алтай, Марқакөл, Үлкен Нарын, Күршім, Шемонаиха, Катонқарағай, Глубокое) мұз кептелісі болуы мүмкін 20 учаскелер анықталды. Бекітілген кестеге сәйкес Шемонаиха ауданындағы 2 учаскеде, Марқакөл ауданындағы 5 учаскеде және Алтай ауданындағы 1 учаскеде тиісті жұмыстар жүргізілді, – деп толықтырды атқарылған шаруаларды Амангелді Ахметұлы.

Бұдан бөлек, егер ахуал күрделене қалған жағдайда жедел әрекет ету үшін жергілікті атқарушы органдардың, Төтенше жағдайлар департаментінің және азаматтық қорғау қызметтері құрамдарының 3677 адамы, 556 бірлік техника, 75 жүзу құралы және 234 мотопомпамен қамтамасыз етілген күштері мен құралдары сақадай сай дайын тұр.

Қосымша мониторинг жүргізу және жедел әрекет ету мақсатында Алтай ауданына 68303 әскери бөлімінің әскери қызметшісі жіберілді.

Зардап шеккен тұрғындарды қабылдау үшін жалпы сыйымдылығы 13 мың адамды құрайтын 137 эвакуациялық қабылдау пункті анықталып, халық арасында түсіндіру жұмыстары жүргізілуде. Оның аясында 411 рейд ұйымдастырылып, 12 мыңнан астам жадынама таратылған.

Құтқарушы мамандардың мәлімдеуінше, су тасқыны қаупі күрделенген жағдайда халықты құлақтандыру шаралары – 48 сиреналық-сөйлеу құрылғысы, СМС-тарату, телерадио хабарларын қармап алу және "Дармен" мобильдік қосымшасы арқылы жүргізілетін болады.

Сонымен қоса, төтенше жағдай туындаған кезде "Масс Алерт" халықты хабардар ету жүйесі іске қосылатын болады.

Фото: ШҚО ТЖД баспасөз қызметі

Шығыс Қазақстанда тасқын мен өрт қауіпсіздігіне дайындық күшейтілді

Шығыс Қазақстан облысында көктемгі су тасқыны кезеңіне дайындық және өрт қауіпсіздігін қамтамасыз ету бағытында кешенді алдын алу шаралары қарқынды жүргізілуде. Су тасқыны қаупін дер кезінде анықтап, жедел әрекет ету мақсатында Төтенше жағдайлар департаментінде тәулік бойы жедел штаб қызмет етуде. Жұмыс тобы тасқын жағдайына тұрақты мониторинг жүргізіп, барлық тиісті қызметтердің іс-қимылын үйлестіруде, деп хабарлайды Ilove-ulan.kz тілшісі.

Күрделі жағдай туындаған мезетте шұғыл әрекетке көшетін 3677 адамнан тұратын азаматтық қорғау күші дайын. Сонымен қатар, 556 бірлік техника, 75 жүзу құралы және 234 мотопомпа жұмылдырылмақ. Бұл құрамға ТЖД бөлімшелері, құтқару батальоны, жергілікті атқарушы органдар, Ұлттық ұлан, Полиция департаменті және Қорғаныс министрлігінің әскери бөлімдері кіреді.

– Халықты эвакуациялау және күштерді жедел жеткізу үшін 11 әуе кемесі, соның ішінде Ми-8 және Ми-2 тікұшақтары тұрақты дайындыққа қойылған. Жыл басынан бері Үлкен Нарын, Самар, Алтай, Катонқарағай және Ұлан аудандарындағы су тасқыны қаупі бар учаскелерге үш рет әуеден бақылау жүргізілді. Зерттеу нәтижелері аумақта қар жамылғысының қалың екенін, Бұқтырма өзенінің толықтай мұз құрсауында жатқанын, тек кей жерлерде ғана ойықтар байқалатынын көрсетті, - дейді ШҚО ТЖД бастығы Рашид Блялов.

Жақында ТЖД мамандары жергілікті атқарушы органдармен бірлесіп Алтай ауданы мен Риддер қаласындағы қауіпті учаскелерді тексеріп, қорғаныс құрылыстары мен елді мекендердің дайындығын бағалады. Келесі әуеден бақылау Марқакөл, Тарбағатай және Зайсан аудандарында жүргізіледі.

«Қазгидромет» РМК мәліметіне сәйкес, Зайсан, Шемонаиха, Тарбағатай және Үлкен Нарын аудандарында қар қоры көпжылдық орташа көрсеткіштен жоғары. Соған қарамастан, облыс өзендеріндегі гидрологиялық жағдай әзірге тұрақты, су деңгейі қауіпті межеден төмен деңгейде сақталып отыр. Алдағы уақытта өңірде тағы да қалың қар жаууы ықтимал, наурыздың 20-нан кейін жағдай тағы бір мәрте таразыға салынбақ.

Көлік инфрақұрылымын қорғау бағытындағы жұмыстар да жүйелі жүргізілуде. Қазіргі уақытта су өткізу құбырларының 58 пайызы және көпірлердің 71,6 пайызы тазартылған. Бұл жұмыстарды 20 наурызға дейін толық аяқтау жоспарланған. Еріген қар суларын кедергісіз өткізу үшін инертті материалдар, құм толтырылған қаптар мен қажетті құрал-жабдықтар алдын ала дайындалды. Өткен дүйсенбіде Тарбағатай ауданындағы «М-38 Омбы – Майқапшағай – Шілікті – Ақжар» облыстық жолында еріген қар суы жол үстінен асқанымен, жабыны шайылмады, көлік қозғалысы тоқтаған жоқ. Жалпы ұзындығы 5,2 мың шақырымды құрайтын облыс жолдарында төрт мыңға жуық су өткізу құбыры мен 250-ден астам көпір бар.

– Кейбір құрылыстардың сырт көзге көрінбейтін ақаулары болуы мүмкін. Сондықтан гидротехникалық нысандардың жайын қатаң бақылауда ұстау қажет. Судың өсу деңгейін, гидрологиялық жағдайларды қадағалап отырыңыздар. Төтенше жағдайлар қызметі күтілетін су тасқындарының даму жоспары болжамына сәйкес жұмыстарды ұйымдастыруы қажет. Шұғыл әрі қауіп төндіріп тұрған болжамдарды күн сайын ұсынып отырыңыздар, - деді Шығыс Қазақстан облысы әкімі Нұрымбет Сақтағанов.

Өрт қауіпсіздігі мәселесі де ерекше назарда. Төтенше жағдайлар департаментінің мәліметінше, жыл басынан бері тіркелген өрттердің басым бөлігі тұрғын үй секторында болған, сондай-ақ көлік құралдарының жану фактілері де кездескен. Негізгі себептер — электр жабдықтарын және пешпен жылыту жүйелерін пайдалану кезінде қауіпсіздік талаптарының сақталмауы. Өрт салдарынан 11 адам көз жұмса, олардың үшеуі балалар. ТЖД деректеріне сәйкес, барлық қайғылы оқиғаларда балалар ересектердің қарауынсыз қалған.

Кеңес барысында еліміздің басқа өңірлерінде орын алған резонансты оқиғалар — Щучинск қаласындағы дәмханада газ-ауа қоспасының жарылуы мен Семейдегі ойын-сауық орталығындағы өрт те тілге тиек етіліп, адамдар көп жиналатын нысандардағы қауіпсіздік талаптарын күшейту қажеттігі атап өтілді.

Аймақ басшысы Нұрымбет Сақтағанов су тасқынына дайындық пен өрт қауіпсіздігі бойынша алдын алу шараларын күшейтуді тапсырды. Қала және аудан әкімдіктеріне ТЖД-мен бірлесіп халық арасында түсіндіру жұмыстарын күшейту, әсіресе, көпбалалы отбасылар, қарттар мен әлеуметтік осал топтар тұратын үйлерге ерекше назар аудару міндеттелді.

Энергетика және тұрғын үй-коммуналдық шаруашылық басқармасына тұрмыстық газ баллондарын және газ жабдықтарын пайдалану барысын қатаң бақылауға алып, газ-техникалық инспекция жұмысына серпін беру жүктелді. Ал Білім басқармасына ата-аналар арасында балаларды қараусыз қалдырмау жөніндегі түсіндіру жұмыстарын күшейтіп, мектептерде қауіпсіздік сабақтары мен эвакуациялық жаттығулар ұйымдастыру ұсынылды.

Сондай-ақ, кәсіпкерлермен және адамдар көп жиналатын нысандар иелерімен өрт қауіпсіздігі талаптарын қатаң сақтау жөнінде түсіндіру жұмыстарын жүргізу қажеттігі айтылды. Бұл талаптар, әсіресе, алда келе жатқан Ораза айт пен Наурыз мейрамы қарсаңында өзекті. Жалпы өңірдегі су тасқыны мен өрт қауіпсіздігі жағдайы тұрақты бақылауда.

Фото: Altainews.kz

Шығыс Қазақстанда өзендерде жару жұмыстары басталды

Су тасқынына қарсы іс-шаралар аясында Шығыс Қазақстан облысындағы ірі өзендердегі мұзды жару жұмыстары басталды, деп хабарлайды Ilove-ulan.kz тілшісі.

Бүгін Шемонаиха ауданындағы Усть-Таловка ауылы маңында Уба өзеніндегі теміржол көпірі ауданында 8208 шаршы метр аумақта мұз жару жұмыстары жүргізілді.

Облыстық ТЖД баспасөз қызметінің мәліметіне сүйенсек, аталған аумақтағы жарылыс жасалған жерлерде өзендегі мұздың қалыңдығы шамамен 50 сантиметрді құрайды.

Жүргізілген жұмыстар Уба өзенінің су өткізу қабілетін арттыруға және мұз кептелістерін болдырмауға мүмкіндік береді.

Фото: ШҚО ТЖД баспасөз қызметі

Шығыс Қазақстанда "Көктем – 2026" оқу-жаттығуы өтіп жатыр

Шығыс Қазақстанда алдағы тәуліктерде қатты аяз күтіледі

«Қазгидрометтің» ақпараты бойынша 24 ақпанда Шығыс Қазақстан облысында ауа температурасы түнде 25-30, облыстың оңтүстігінде 22 градусқа дейін төмендейді, деп хабарлайды Ilove-ulan.kz тілшісі.

Бұл күні күндіз 23-28, облыстың оңтүстігінде 20 градус, ал 25 ақпанда түнде 32-37, облыстың оңтүстігінде 25, облыстың солтүстігінде, шығысында 40 градус қатты аязға дейін күрт суытады.

Сондықтан өңірдің ТЖД мамандары азаматтарға елді мекендерден тыс жерлерге барудан бас тартуды ұсынады.

Қатты аязда аса қажеттілік болмаса, үйден шықпауға тырысқан жөн. Бірақ шыққан жағдайда жылы және қалың киініп, автокөлікті күтіп ұзақ тұрмаған дұрыс.

Көлікті аязда жылыту үшін ашық отты пайдалануға болмайды.

– Пештерді жиі жағыңыз, бірақ ұзақтығы 1,5 сағаттан аспайтын болсын. Алайда, шектен тыс қыздырмаңыз. Ұйқыға жатқанша екі сағат бұрын пешті жағуды тоқтатыңыз, отын толығымен жанғанша, қақпақты жаппаңыз. Тұрғын үйді қосымша жылытатын болсаңыз, электр жылытқыштарының өрт жағдайына назар аударыңыз, – дейді құтқарушы мамандар.

Төтенше жағдай кезінде 112 нөміріне хабарласу қажет.

Шығыс Қазақстанның су тасқыны кезеңіне дайындығы пысықталды

Шығыс Қазақстан облысы аумағында жоғары дайындық режимі енгізілді. Су тасқыны қаупі кезеңінде жедел әрекет ету үшін азаматтық қорғау күштері мен құралдарының шамамен 3700 адамнан тұратын топтамасы жасақталды, деп хабарлайды Ilove-ulan.kz тілшісі.

Сонымен қатар 240-қа жуық мотопомпа, құтқарушылар мен жергілікті атқарушы органдардың 75 жүзу құралы және 500-ден астам техника дайындалды. 58,7 мың дана қап, 9957 тонна инертті материал және 386 тоннадан астам жанар-жағармай қоры әзірленді.

Қазіргі уақытта жергілікті атқарушы органдар 258 мың текше метрден астам қарды сыртқа шығарды. Су айдындарына тұрақты мониторинг жүргізілуде.

ТЖМ тұрғындарға көктемгі кезеңге алдын ала дайындалуды ұсынады: аула аумағын қардан тазарту, арықтар мен су ағатын каналдарды мұздан аршу — бұл еріген судың кедергісіз ағуына мүмкіндік береді. Төтенше жағдай туындаған жағдайда 112 нөміріне хабарласу қажет.

Фото/видео: ШҚО ТЖД